dalla Redazione
Durante a guera, garò vudo quindase ani, anca manco, tredase o
quatordase. In chel tempo, de pan ghin gèra poco e doveimo vivare con un eto,
un eto e meso de pan al dì, ma ai zovani i ghe ne dava anca manco e a l’omo de
pì, parchè el gavéa da lavorare a caricare a jara sol Brenta col baìle e cussì
el dovéa magnar de pì, senò aea sera nol ghea faséa a vegner casa, el cascava
in tera daea stanchesa e par questo ai putei, i ghin’ dava manco da magnare.
Mi andavo a catare a me tosa e a vedéo sempre pì trista, pì deboe e a
tribolava tanto, invesse mi jero fortunà che so’nato so ‘na fameja che el pan
no ze mai mancà perchè o faseimo in casa e in granaro ghe jera senpre i sesti
pieni de ciope de pan, picài sol trave. Alora se fasea el pan anca par mesi; el
vegnéa un po’duro, ma senpre bon, specie quando che o tajaimo a fete.
Vedéo a me tosa che a sofrìa e a gavéa tanta fame, a ghe digo: “da
domàn no te sofrirè pì a fame e te fasso vegnère el pan in casa”.
La ze stà suìto contenta, e a me dise: “come fetu?” Digo: “règoea el
to reojo col mio e che no ghe sia un menuto de sbaglio - digo - tute e sere ae sie
e vintidò, digo, te te presenti aea finestra dea camara daea parte da drìo e mi
vò sol granaro nea finistra davanti e te buto coa fionda ‘na ciopa de pan”.
“Ma!...come fetu?...come faretu?...”
“Ti no ‘sta pensare, ti te devi ciaparla al voeo, e portarla drento ‘sta
ciopa del pan, ogni dì”.
‘Sta ciopa de pan a jera granda come un putèo coe fasse, a jera longa
cussì, nò ciopete da eto, ma a jera granda.
Vào sol Brenta e gò catà ‘na gran forcea de olmo, a jera proprio quea
giusta e longa. Dopo a casa gò fato ‘na curamèa e par farla a ghe go tajà a
jacheta de me poro nono chel jera andà in Francia par laorare e la gà senpre
risparmià par vegnere a casa co a so bea jacheta de curame, e mi ghe gò tajà
tuto el da drìo par farme na bea curamèa.
Parecio ‘sta bea fionda, bea da farghe invidia ai veci. Prima de tuto
gò fato la prova par alenarme anca soa distansa e dopo, ogni sera, andavo sol
granaro, ciapo la me ciopa de pan, vardo el reojo e quando ze la ora, la tiravo.
Me paréa de vedare un missie, el voeava come chee bombe là, sì, la W1,
la W2 tedesca e vedeo chel rivava preciso sol posto dove a me morosa lo ciapava
al vòeo e seo magnava.
Però ghe jera dée baterie tedesche qua vissin al ponte de Brenta che e
faséa da contraerea.
I ga cominsià a sospetare che i vedéa passare senpre ‘sti cosi aea
stessa ora e i ghe ghea fato savère a Hitler e lu el se gà anca rabià par
questo; invesse mì me gò fregà parchè gò senpre continuà lo stesso, senpre de
nascosto e cambiavo i orari a fare el lancio del pan aea me morosa e cussì a ze
guarìa daea fame.
[Fuori Luogo ringrazia Ceo e la sua famiglia per l'amichevole
permesso di pubblicare questo racconto]
Nessun commento:
Posta un commento